Ceanncheathrú Parco delle Colline Metallifere agus Teatro delle Rocce.

I measc thaitneamhachtaí an tsuímh, tá ceanncheathrú Parco delle Colline Metallifere i bhfoirgneamh álainn Chomhlacht Montecatini ina raibh na Bagnetti tráth; iarsmalann gheo-éagsúlachta agus mhianadóireachta GeoMet, atá mar thúsphointe na taiscéalaíochta i gcríoch ilghnéitheach na Páirce; Museo Minerario in Galleria, atá suite i rannóg den seanáiléar um stóráil pléascán i Mianach Gavorrano, áit ar féidir tumadh isteach go pearsanta i saol an mhianadóra; agus Teatro delle Rocce, amharclann álainn faoin aer inar féidir freastal ar léirithe ealaíonta agus ceolchoirmeacha laistigh de chairéal taibhseach aolchloiche.

Iarsmalann mhianadóireachta in áiléar barántúil

Tá an iarsmalann lonnaithe san áit a dtugtaí riservetta air tráth, a bhí ina áiléar mianadóireachta a úsáidtí mar stóras pléascán. Léirítear tréimhsí éagsúla an tsuímh mianadóireachta, na teicnící saothraithe agus na hoibreacha tacaíochta le linn an turais. Thar aon rud eile, áfach, ligeann tráchtaireacht an turais in éineacht le soilse, íomhánna, fuaimeanna agus suiteáin ilmheán don chuairteoir tumadh isteach in imeachtaí stairiúla Mhianach Gavorrano agus sna coinníollacha an-chrua timpeallachta agus oibre a bhí ann. Ní mór turas treoraithe a chur in áirithint. Cuirtear an costas a bhaineann leis an treoraí in áireamh sa táille iontrála.

Cuir in áirithe (nasc seachtrach)

Mianach Ravi Marchi

Suíomh seandálaíochta tionsclaíoch faoin aer is ea Ravi Marchi, agus é mar chomhlánú ar chuairt ar an iarsmalann san áiléar. Is ansin gur féidir féachaint ar shuiteálacha dromchla Mhianach Marchi a bhain le cóireáil piríte, suiteálacha a cuireadh as feidhm in 1965 ach a athchóiríodh ón am sin. Le linn an turais, tugtar léargas ar stair shaoithiúil an mhianaigh agus ar iompar agus próiseáil na méine a thochlaítí as an talamh tráth. Ní mór turas treoraithe a chur in áirithint. Cuirtear an costas a bhaineann leis an treoraí in áireamh sa táille iontrála. I dteannta na dturas treoraithe, is féidir an suíomh a úsáid le haghaidh ceardlanna oideachasúla, imeachtaí cultúrtha, léirithe amharclannaíochta, comhdhálacha agus cruinnithe faoin aer.

Na trabhairtíní agus Ard-Eaglais Massa Marittima

I gcroílár na Geopháirce, tá an baile meánaoiseach Massa Marittima ina luí ar ardchlár trabhairtín (túfa cailcreach) a foirmíodh i dtimpeallacht ársa abhann locha 130,000 bliain ó shin. Tá clocha na bhfoirgneamh stairiúil agus ballaí maorga Ard-Eaglais San Cerbone mar mheabhrú buan ar na laethanta fadó. Dála leabhar scéalta, insíonn siad gurbh ann do lochanna agus riasca a bhí breac le heasanna beaga ar mhachaire mór fairsing, a ndearnadh leiceann cnoic den timpeallacht a bhí ann le himeacht na dtréimhsí geolaíocha.

Cruinneachán laibhe Roccatederighi.

Sráidbhaile álainn meánaoiseach ina bhfeictear tithe cloiche agus sráideanna doirneogacha is ea Roccatederighi, atá ina luí ar chruinneachán laibhe a bhí beo idir 2.6 agus 2 mhilliún bliain ó shin, tráth an Phléicéinigh. Is uathúil an radharc geolaíoch atá sa chruinneachán ubhchruthach sin agus sna carraigeacha bolcánacha a múnlaíodh le caitheamh na haimsire. Ar fálróid trí na sráideanna cúnga, is féidir foghlaim faoi charraig bholcánach na riailíte ar tógadh na tithe ársa aisti agus faoin gcaoi ar mhúnlaigh fíorshníodóirí an tírdhreacha – an t-uisce agus an ghaoth – ina cruthanna aisteacha agus ina dealbha allabhracha í.

Suíomh geoiteirmeach Biancane

Suíomh uathúil geolaíoch an tírdhreach seo ar nós na gealaí, a múnlaíodh le teas a thagann aníos ó íochtar an domhain trí shéidphoill shuaithinseacha ar an dromchla chun gal a astú ag teochtaí arda (suas go 100°C).

Le linn siúlóide feadh chonairí na háite, ina léirítear fórsa an dúlra ina iomláine, bíonn an cuairteoir faoi gheasa dhathanna na gcarraigeacha “a dódh” leis an ngníomhaíocht gheoiteirmeach, agus iad i gcodarsnacht leis na cinn eile “a glanadh” le himshruthú na leachtanna hidriteirmeacha as ar tháinig an t-ainm “Biancane”. Ar an tslí, is féidir breathnú ar fhoirmiú na gcriostal sulfair, éisteacht le huisce lábach an locha ag plobarnach le gal a thagann aníos ón talamh agus taitneamh a bhaint as tírdhreacha mórthaibhseacha.

Cairéil alúiníte Poggio Speranzona.

Fianaise ar dhianmhianadóireacht na halúiníte – is é sin, an tsulfáit potaisiam alúmanaim – ón 15ú haois go dtí an 19ú haois is ea na cairéil seo i gcroílár an fhásaigh. Spreagadh spéis nach beag sa mhianra sin de thairbhe na bhfeidhmeanna a bhíodh leis in earnálacha éagsúla, idir thonnleasú an leathair agus an leigheas. Téann an suíomh geolaíoch go mór i bhfeidhm ar an gcuairteoir de bharr na codarsnachta idir dathanna beoga na gcarraigeacha breac-chlaochlaithe agus an mhian gheal bhán. Tá flúirse na gcairéal dromchla agus na n-áiléar, arb iontach an mhéid atá i roinnt acu, mar chruthúnas, uair amháin eile, ar an inniúlacht a bhíodh sna mianadóirí fadó.

Mianaigh agus cairéil Poggio Mutti e le Cornate di Gerfalco.

Feadh chuarbhealach Poggio Mutti atá thart ar 2 km ar fad, déanann an cuairteoir taiscéalaíocht ar na pluaiseanna mianaigh a tochlaíodh isteach i gcroí na cré. Fianaise is ea iad sin ar a eolaí a bhíodh na mianadóirí ar an dúlra agus acmhainní na fo-ithreach, mar aon lena gcuid seiftiúlachta agus inniúlachta i mbaint na mianraí agus iad ar thóir airgid chun boinn a bhualadh.

Is ar bhealach atá thart ar 2.5 km a insítear an scéal faoi rilíf Cornate di Gerfalco, arb í is airde i measc Colline Metallifere agus a bhfuil a carraigeacha mar fhinnéithe balbha ar na teagmhais gheolaíocha a tharla na milliúin blianta ó shin. Is féidir “teagmháil” leis na fórsaí lenar cruthaíodh í, breathnú ar sheanteicnící na mianadóirí lena gcur i gcomparáid le taighde mianadóireachta an lae inniu agus lán na súl a bhaint as na cairéil mhaorga atá déanta d’aolchloch amóiníte deirge – an t-ábhar céanna as a ndearnadh clúdach sciamhach Ard-Eaglais Siena – i measc an dúlra gan mhilleadh agus na dtírdhreach fíorálainn.

Cuan piríte Terra Rossa agus Cala Violina

Cuas beag i lár dhá cheann tíre is ea Cala Violina, a bhfuil cáil air de bharr a ghainimh ghléigil a dtagann fuaim ar nós an veidhlín as nuair a shiúltar anuas air nó nuair a chuimlítear é. An feiniméan sin, a bhfuair an suíomh a ainm as, tá sé mar thoradh ar chomhdhéanamh an ghainimh atá beagnach go hiomlán ina ghráinní grianchloiche. Faoi urchar méaróige den áit dhraíochtach sin, is féidir taitneamh a bhaint as sampla iontach den tseandálaíocht thionsclaíoch: Terra Rossa, iarsmalann faoin aer inar fágadh an t-am ina staic. In iarsmaí an bhealaigh cábla, arbh é an ceann ba mhó san Eoraip tráth, lena gceanglaítí na mianaigh intíre leis an gcalafort, le cois na sadhlann, na dtollán agus na gclós tréigthe, insítear scéal faoi éacht tionsclaíochta lenar múnlaíodh críoch na Páirce sa chéad seo caite. Is san áit sin a thagann an dúlra agus an stair le chéile i dtírdhreach allabhrach meallacach.